بعد خراب مالطة

مش عارف لية كل ما ببص على البلوجز و اشوف نشرة الاخبار و اقرا الجرايد باحس ان البلد دة محتاجة ثورة ، عمري ما هافقد الامل عمري ما هاقول طظ و انشالله البلد تولع ،لا ،هاحاول مرة و اتنين و تلاتة و عشرة كمان اني اعمل فرق و اوصل لحل .بس يكون حل صح لا يكون معتمد على الشتيمة و لا التخريب و استخدام سياسة الارهاب و استخدام مبدا"عجبا لمن لا يجد قوت يومه و لا يخرج شاهرا سيفه على الناس". طاب و الناس ذنبها اية .قلت قبل كدة و هافضل اقول ان الطريقة الي انا شايف الناس عاوزة تغير بيها وضعها غير صحيحة و الي البعض بيعمله مش هيؤدي للحرية بالعكس ده هيؤدي لفوضى. بس ممكن حد فيكم يجاوبني احنا اية الي وصلنا للمرحلة دة ؟ ، ناس هتقول الحكومة و انها بتسرق و تدبر خطط شيطانية للاستيلاء على حياة المواطن، ماشي انا موافق ان كلامهم صح و لكن لما احنا عارفين ان الحكومة مكوشة على البلد بالطريقة دة فضلنا لية ساكتين ؟ لية صرخنا بعد خراب مالطة ؟

طريقة جديدة

في باديء الأمر أود أن أعتذر عن عدم الكتابة لفترة طويلة و لكن ذلك راجع لانشغالي الشديد في الفترة الماضية.المهم ،يا ريت كل اصحاب المدونات الي بعتبرهم جنود الحرب و المرحلة القادمة يقروا الكلام ده و يفكروا فيه.انتو تفتكروا ان الزعيء و الجعجعة و المظاهرات كمان ممكن تعمل حاجة ، انا عن نفسي ماظنش ، ليه؟ لان ببساطة احنا عندنا سياسة اسمها "نباح الكلاب" يعني الي عاوز يتكلم يتكلم لكن احنا(الحكومة) الي نحدد امتى نسيبهم يتكلموا و امتى لازم يحرسوا و الحمد لله عندهم الف طريقة و طريقة .لكن هل معنى الكلام ده اننا نسكت ، هل معنا الكلام ده ان احنا نشوف مستقبلنا بيضيع و نقف نتفرج ؟ لا طبعا و ألف لا كمان .انا بس كل الي نفسي فيه اننا نشوف طريقة توصلنا فعلا لهدفنا.نقوي احزابنا السياسية ،نعمل احنا حزب حقيقي مش ورقي و كله خلافات ،ان شاللة حتى نوزع منشورات زي زمان ،بس المهم نوصل لحل.طبعا نفسي اكتب اكتر بس كالعادة مش فاضي بس وعد اني احاول ادور على افكار و انني احاول اوصل لكل فرد بيقرا المدونة بتاعتي عشان اتناقش معاه و نوصل لحل.

في اول (بوست) لي علقت على حكاية رحاب و جبفارا و ان لهم الفضل في خروج مدونتي للوجود.لكن اسمحوا لي بما انني قد اصبحت جزءا من هذا العالم (المدونات) ان اعمل معكم على تطويره و تحسينه، فقد لفت نظري بشدة ان معظم المدونات لا يعرف اصحابها عن انفسهم و يختاروا اسما وهميا يبثوا و يتصرفوا من خلاله و ذلك بهدف الخروج عن اي قيد أو معايير تحكمنا ، قد يكون السبب هو الخوف من السلطات ،خصوصا اذا كان موضوع المدونة سياسيا و يستخدمها كمنبر للمناداة بافكار و بث رسائل معينة.لكن ما لا افهمه هو كيف يمكن لي الثقة و الاقتناع بافكار شخص يخاف هو نفسه من نشرها،ذلك اذا كان موضوع المدونة سياسيا كما اتفقنا اما ملاحظتي الأخرى فهي أن باقي المدونات تحتوي على بعض الأعمال الأدبية مختلفة المستويات،فلماذا يخفي هؤلاء شخصيتهم،و هل ظهرت المدوناتت لهذا الغرض.اعلم أن الكثيرين حين يقرئون هذا الكلام سوف يقولون اننا احرار نفعل ما نشاء بمدوناتنا و هنا أؤكد انني لست فوق الجمبع للنقد أو شيء من هذا القبيل انما هي بعض التساؤلات التي طرأت على ذهني و فضلت أن اناقشها و اطرحها عليكم كي نصل كما ذكرت لأفضل شكل لمجتمع المدونات و نحقق أفضل استفادة مرجوة منها.و لكم جزيل الشكر و خالص التقدير.

بسم الله الرحمن الرحيم

اولا احب اعترف ان الفضل يرجع للاستاذ هيكل و استاذي د.محمود و استاذتي مها في اني اعرف او اسمع عن حاجة اسمها بلوج او المدونة كما يطلق عليها البعض.اما مسالة ان انشيء لنفسي مدونة فالفضل يرجع لبهية و رحاب الي اعترف اني فضلت اقرأ لها -على الرغم ان قصصها بالنسبة ليا عادية-الا انها شدتني خصوصا بعد ما الاخ بتاع الذاعة سرق قصتها .كمان ادين بالفضل لجيفارا .